Systur í baði

A long way gone

Las þessa bók um daginn. Mæli með henni fyrir alla lesendur Fréttasíðu Grandavegarins (ég get lánað áhugasömum mitt eintak).

Í bókinni segir Ishmael Beah sögu sína af því hvernig 12 ára stráklingur í Sierra Leone, sem er á leiðinni til næstu borgar til að taka þátt í hæfileikakeppni með því að dansa hipphopp, sogast inn í borgarastyrjöldina. Hann týnir fjölskyldu sinni og vafrar um skóginn og milli þorpa ásamt öðrum drengjum á svipuðum aldri í langan tíma. Hann kemst loks komst í skjól og undir verndarvæng fullorðinna, en ekki líður á löngu þar herinn krefst krafta hans og annarra drengja.

Þar eru þeir látnir taka þátt í ólýsanlegum grimmdarverkum, klikkaðir af dópi og heilaþvotti.

Þegar hann var 16 ára var honum bjargað af Barnahjálp Sameinuðu þjóðanna sem kom honum í endurhæfingu.

Þetta er ótrúleg saga, skrifuð af mikilli einlægni og trú á að hið góða fái sigrað hið illa.

Þið verðið að lesa þessa bók

Gönguferð til US and A

Við fórum í frábæra ferð til Minnisota og heimsóttum Ágúst, Kolbrúnu, Sigurjón og Margréti.

Opinberi tilgangur ferðarinnar var að ganga SHT (Superior Hiking Trail, http://www.shta.org/) sem er gönguleið við Lake Superior. Þetta er í raun eins og að ganga við úthaf, því Lake Superior er stærsta ferskvatn í heimi og er að flatarmáli á við 80% af Íslandi.

Hinn raunverulegi tilgangur var hinsvegar að versla í hinni frábæru Rei (http://www.rei.com/) útivistarbúð og fara svo á góða veitingastaði (og http://www.mallofamerica.com/).

Hér eru nokkrar myndir úr ferðinni.

Við keyrðum norður á bóginn (sumir voru á hægfara farartækjum).

Stoppuðum á góðum veitingastað á leiðinni.

Byrjuðum gönguna, en við gengum samtal um 45 km.

Fyrstu nóttina, var tjaldað í myrkri, þá komu höfuðljósin úr Rei sér vel.
Guðbergur vildi endilega taka tafl og klukku með svo bræður hans gætu telft við öll hugsanleg tækifæri....

Útsýnið var stórkostlegt.

Enduðum svo á að borða á góðum veitingastað eftir 3 nætur í tjaldi. "My brother is still hungry......"

Kvöldsólin.

Ólafur Þorri Sigurjónsson fékk skurð á æfingu

Frétt af heimasíðu KR
http://www.kr.is/karfa/frettir/?cat_id=16500&ew_0_a_id=289198
Ólafur Þorri Sigurjónsson varð fyrir því óhappi að karfa sem hengd er á rimlana í DHL-Höllinni féll af þegar að þeir félagar voru á fullu við að troða á hana. Karfan er ekki troðslukarfa og því gerðist það því miður að karfan féll á Ólaf Þorra þegar að hann og félagar hans voru að troða "alley op" með þeim afleiðingum að sauma þurfti strákinn sex þriggjastiga spor í augabrúnina.
Ólafur Þorri var kominn heim kátur með stóran plástur yfir saumunum.
Ólafur Þorri getur ekki beðið eftir að komast á æfingu á nýjan leik en öllum strákunum á æfingu dauðbrá þegar að atvikið gerðist. Strákurinn er brattur og það er fyrir öllu. Við vonum að Ólafur Þorri jafni sig sem allra fyrst og mæti gallvaskur á minniboltaæfingar.

Innstidalur

Fórum í frábæra ferð um síðustu helgi. Því miður misstu Þórdís og Óli af henni þar sem þau voru í Vindáshlíð og á Akureyri þannig að við verðum pottþétt að endurtaka ferðina síðar.
Við vorum hálf löt allan laugardaginn, vorum bara að stússast í þvottum og tiltekt heima við fram eftir degi. Veðrið var hins vegar svo frábært að við vorum orðin ansi óróleg seinni part dags að komast eitthvert út auk þess sem Signý sótti það mjög fast að fá að labba af stað með nýja bakpokann sinn í alvöru ferð.
Þó að langt væri liðið á daginn ákváðum við því að drífa okkur af stað í útilegu, en eftir flutningana í vetur er hins vegar svo mikið óskipulag á útilegugræjunum okkar þannig að við urðum að byrja á að keyra í Forsæti og finna svefnpoka og dýnur.

Keyrðum svo til baka yfir heiðina og lögðum af stað frá skíðaskála Víkings í Sleggjubeinsskarði kl. 23 á laugardagskvöldið. Þykk þoka lá yfir svæðinu en við fylgdum “bláu stikunum”.

Þurftum stundum að giska á í hvaða stefnu næsta stika væri en náðum heilu og höldnu inn í Innstadal um kl. 23:45. Fylgdum þá rauðum læk í vesturátt þar til við komum inn að fallegu gili þar sem við tjölduðum og fengum okkur heitt kakó og samloku fyrir svefninn.
Vöknuðum í æðislegu veðri á sunnudagsmorgninum og fórum í morgungöngu upp á Húsmúla og þaðan eggjarnar upp á Hengilinn. Fórum ekki alla leið á Skeggja, en fengum samt stórkostlegt útsýni. Tókum svo saman tjaldið og gengum sömu leið til baka og vorum komin að Víkingsskála kl. ca. 14 eftir um 45 mín göngu.Er búin að vera að skoða frábæra síðu um Hengilssvæðið og stal myndinni af vegvísinum þaðan til að myndskreyta ferðasöguna þangað til ég set inn okkar myndir.
Nú er bara að skipuleggja hvaða ferð á að fara um næstu helgi ;-)

Góðir gestir frá Svíþjóð

Á fimmtudaginn komu í mat til okkar Helena frænka frá Svíþjóð ásamt fjölskyldu. Við buðum upp á íslenska kjötsúpu sem rann ljúflega niður þrátt fyrir að manni finnist hún hálf óviðeigandi á svona heitum sumardegi. Lóla, Rúnar og fjölskyldur komu líka í mat og náðu stelpurnar allar strax mjög vel saman. Eftir útileiki fram undir miðnætti fengu Snæfríður, Wilma og Althea svo að gista hjá okkur, en María Katrín fór heim með pabba sínum. Þetta var virkilega skemmtileg heimsókn en þægilegri gesti þau en Helenu, Staffan og dæturnar ásamt uppáhalds systkinum mínum og þeirra frábæru fjölskyldum er vart hægt að hugsa sér.
Set inn myndir síðar.

Af barnaþrælkun og fleiri sumarverkefnum

Sumarið hefur ekki verið alveg tíðindalaust hjá Grandavegarsystkinunum. Vikuna sem Ólafur Þorri ætlaði að vera í fótboltaskóla bauðst honum að fara í byggingarvinnu með Þórbergi frænda sínum. Atvinnan var auðvitað þegin með miklum þökkum og það var mjög spenntur ungur maður sem vaknaði eld snemma morguns og setti upp vinnuvettlingana áður en hann nuddaði stírunar úr augunum.
Þórdís komst í skrifstofuvinnu hjá Jáverk í tvo daga þar sem hún flokkaði reikninga, raðaði í og merkti möppur, ógilti teikningar og fleira spennandi.
Öll systkinin hafa svo komist í sveitina til Afa og Ömmu þar sem verkefnin eru margvísleg.

Bæði Þórdís og Signý hafa farið í vikudvöl í Vindáshlíð í sumar en Ólafur Þorri fór til Afa og Ömmu í Mánahlíðinni og var þar í rúma viku með Arnari Hauki.

Skátar og Klifurhúsið

Grandavegarbörnin hafa mjög ákveðnar óskir um námskeið í sumar og til allrar lukku tókst að uppfyllar allar óskir.

Ólafur Þorri fór á útilífsnámskeið hjá Ægisbúum 25.-29. júní. Þar fékk hann rauðan skátaklút sem hann bar stoltur. Námskeiðið endaði á tjaldútilegu á Úlfljótsvatni og var hamingja piltisins í feðalok mikil sem og þreyta.

Signý var sömu viku á klifurnámskeiði í Klifurhúsinu. Eins og við mátti búast skemmti hún sér mjög vel við klifur bæði innanhúss og í Öskjuhlíðinni.

Vikuna á eftir fór svo Þórdís á samskonar námskeið í Klifurhúsinu og skipuleggja þær systur núna miklar klifurferðir í sumar.

Reykjadalur

Gengum okkur niður eftir Leggjabrjót með því að taka stutt rölt inn í Reykjadal á sunnudeginum en þangað er um 3 km ganga frá Rjúpnabrekkum í Hveragerði (fylgdum rauðu stikunum).

Stutt ganga en gríðarlega falleg, útsýni stórbrotið og hverir og laugar við hvert fótmál.

Við böðuðum okkur í notalega heitum læk. Æðislegt!

Lögðum af stað í fínu veðri en svo kólnaði og hvessti og við þurftum að nota ÖLL aukaföt sem við höfðum meðferðis eftir svamlið. Ferðin tók alls um tvo og hálfan tíma svo það er fínt að fara þetta ef tíminn er stuttur. Fengum svo ís í Eden.

Tókum engar myndir þannig að ég stal þessari fínu mynd af síðu á netinu sem fjallar um náttúrulaugar.

Leggjabrjótur

Fjölskyldan gekk með VST leiðina um Leggjabrjót laugardaginn 30. júní.

Fórum með rútu frá VST og lögðum af stað frá Botnsdal um 10:40.
Fljótlega tóku krakkarnir að leiða gönguna og var rétt svo að þau fengjust til að taka umsamið hádegisstopp. Það hafðist þó og kl. 12:15 var áð efst uppi á Sandhryggnum með útsýni niður í Brynjudal. Eftir mat tók hluti hópsins smá útúrdúr rétt áður en komið var að Sandvatni niður að Skorhagafossi, en börnin gengu áfram beinustu leið og léku sér við Sandvatn á meðan. Stikluðum Súluá (sumir óðu ;-) og tókum svo stutta nestispásu stuttu eftir ármót Súluár og Öxarár. Komum í Hrútagil ca. kl. 16:15 þar sem var grillað og rútan beið eftir okkur. Frábært veður alla leiðina, stuttbuxur allan daginn en í og úr peysunum. Leiðindafluga stærstan hluta leiðarinnar, en flugnanetin redduðu því og allir komu þreyttir en ánægðir til byggða.

Fótbolti

Um leið og við komum heim frá Frakklandi fór Ólafur Þorri á Skagamótið.

Óli, Nonni og Þórdís gistu í tjaldi á Skaganum á meðan við Signý vorum í höfuðborginni.

Signý keppti síðan á fótboltamóti á Tungubökkum í Mosó á sunnudeginum en þangað komu Skagafarar að loknu þeirra móti.

Frakkland 2007

Fleiri myndir og ferðalýsingar hjá Hrísrimafjölskyldunni:

http://hrisrimi.blogspot.com/2007/06/versalir.html

http://hrisrimi.blogspot.com/2007/06/frbrar-mttkur-pars.html

http://hrisrimi.blogspot.com/2007/06/piriac.html

http://hrisrimi.blogspot.com/2007/06/apagarar.html

http://hrisrimi.blogspot.com/2007/06/blog-post.html

Signý 10 ára

Signý Kristín náði þeim áfanga að verða 10 ára í gær, en hún fæddist 1. júní (á sjómannadeginum) árið 1997.
Við héldum afmælisveislu, þar sem öllum bekknum var boðið og var það mjög skemmtilegt.

Hér eru hinsvegar nokkrar myndir af duglegu stelpunni okkar.

Stoltur pabbi.
Signý hlaupastelpa.
Í baði með stóru systur.

Það er gott að knúsa litla bróður sinn.
Signý snjóbrettastelpa.

Signý á hana Nönnu.

Þórbergur segir að Signý sé besta fyrirsæta í heimi, en þessi mynd er tekin af honum.

Elsku Signý. Til hamingju með 10 ára afmælið.

M og P.

Háskóli Íslands í myrkri

Þessi mynd af Háskóla Íslands var tekin með Belfoca II (gömlu vélinni hans Gunnars). Myndavélinni var komið fyrir á stalli Sæmundar, ljósopið nánast lokað og takknum haldið niðri í 60 sek (það var myrkur úti). Frábær vél.

Forsæti I

Forsæti I í kringum 1945. Árið 1956 var húsið stækkað til austurs milli hlöðunnar hægra megin myndinni og íbúðarhússins. Aftur var húsið stækkað árið 1972 og þá til suðurs.

Þessi mynd er hinsvegar alger andstæða við fyrri myndina. Hún er tekin akkúrat úr hinni áttinni (180°) og er tekin um vetur árið 2006.

Listasmiðja í Forsæti

Tengdaforeldrar mínir ætla að opna listasmiðju í sumar (smellið á myndina og skoðið heimasíðuna þeirra).
Núna um hvítasunnuhelgina var hátíðin Fjör í Flóa og af því tilefni var opið hús í gamla fjósinu í Forsæti. Þar er nú kominn glæsilegur sýningarsalur þó að framkvæmdir séu ennþá í fullum gangi. Fjölmargir nýttu tækifærið til að kíkja á framkvæmdirnar þannig að það er greinilega mikill áhugi fyrir þessu verkefni þeirra.
Opnun listasmiðjunnar er svo áformuð þann 19. ágúst næstkomandi.

Gönguferð um helgina

Á fimmtudaginn gekk Grandavegurinn með VST uppá Vífilsfell. Það var ágætisveður í byrjun ferðar, en það breyttist hinsvegar í rigningu og svo snjókomu og mikið rok þegar leið á ferðina og ofar dró. Sumir komust alveg upp, en aðrir snéru við.

Í dag komst fjölskyldan hinsvegar á Hestfjall. Alveg tilvalin fjölskylduganga (samkvæmt Ara Trausta) en að sjálfsögðu völdum við ekki alveg einföldustu leiðina og gengum upp mikinn bratta og skriður. Fórum hinsvegar betri leið niður.

Myndirnar sem fylgja með þessari frétt eru í engu samræmi við greinina. Önnur er tekin í Búdapest, en hin er tekin í Híðarfjalli. Myndirnar eiga það sameignilegt að þær eru báðar teknar á Minolta Autocord.

Óli 8 ára í dag

Óli er... innfæddur KR-ingur. Hann fæddist 16. maí árið 1999. Þetta ár urðu KR ingar meistarar og hann ætlar að komast í meistaradeild bæði í körfubolta og fótbolta

Óli var mjög mikið matargat þegar hann var lítill og fékk sér oft 2-3 morgunmat um leið og allir voru að fara á fætur.

Fleiri myndir

Óli að laga bílinn hans pabba síns (Saabinn eitthvað bilaður)

Alltaf gaman að borða hjá afa og ömmu í sveitinni.

Gott að kúra hjá stóru systrum, sem kenna manni að lesa, skrifa og ....

Þetta er uppáhaldsstaðurinn í Mánahlíðinni (og líka ísskápurinn).

Hitað upp fyrir Frakklandsferð

Spennan magnast og allir farnir að hlakka til.
Hérna hægra megin á síðunni (neðarlega) er Grandavegurinn að safna saman einu og öðru sem gæti nýst vel í aðdraganda Frakklandsferðarinnar.

Ég bendi áhugasömum sérstaklega á tengilinn "Frönskukennsla fyrir krakkana" en Signý og Óli eru orðin frönskuséní eftir að hafa skoðað þetta í gær.

Fyrir þá sem leggja ekki í formlegt frönskunám að sinni þá er stutta orðabókin þar fyrir neðan ágætur upphafsreitur. Ég vil þó taka fram að ég ábyrgist hvorki rithátt né framburð.